Çox pul xərcləmək depressiyaya səbəb ola bilər - Mütəxəssislər xəbərdarlıq edir

Son dövrdə aparılan müşahidələr göstərir ki, insanlar böyük məbləğdə pul xərclədikdən sonra özlərini psixoloji cəhətdən narahat hiss edə bilirlər. Bu hal xüsusilə impulsiv alış-veriş edənlər və maliyyə çətinliyi yaşayan şəxslərdə daha çox özünü göstərir.

meqale.com xəbər verir ki, psixoloqların sözlərinə görə, alış-veriş zamanı yaranan qısa müddətli "xoşbəxtlik hissi" sonradan yerini peşmanlıq, günahkarlıq və narahatlığa verir. Nəticədə insan emosional gərginlik yaşayır, bəzən isə bu vəziyyət depressiyaya qədər gedib çıxır.

Mütəxəssislər bildirir ki, bu cür psixoloji dalğalanmaların əsas səbəbləri arasında maddi qeyri-sabitlik, özünənəzarətin zəifləməsi və sosial təzyiq dayanır. Xüsusilə sosial şəbəkələrdə dəbdə olan məhsullara tələbatın artması insanların planlaşdırılmamış xərc etməsinə təsir göstərir.

Psixoloqlar vətəndaşlara büdcəni əvvəlcədən planlamağı, emosional alış-verişdən çəkinməyi və böyük xərclərə qərar verməzdən öncə düşünməyi tövsiyə edir. Onların sözlərinə görə, düzgün maliyyə davranışları həm psixoloji rahatlığı qorumağa, həm də uzun müddətli maddi sabitlik yaratmağa kömək edir.