"Napoli"nin finaldakı rəqibi bəlli oldu

Futbol üzrə İtaliya Superkubokunda ilk finalçı müəyyənləşib.

meqale.com xəbər verir ki, turnirin yarımfinal mərhələsində "Bolonya" Səudiyyə Ərəbistanında keçirilən oyunda "İnter"lə üz-üzə gəlib. Qarşılaşmanın əsas vaxtı 1:1 hesabı ilə yekunlaşıb. Penaltilər seriyasında isə daha dəqiq olan "Bolonya" rəqibini 3:2 hesabı ilə məğlub edərək finala vəsiqə qazanıb.

Matçın 2-ci dəqiqəsində "İnter"in heyətində Markus Tyuram hesabı açıb. "Bolonya" isə 35-ci dəqiqədə Rikardo Orsolinin penalti zərbəsindən vurduğu qolla tarazlığı bərpa edib.

Qeyd edək ki, "İnter" İtaliyanın vitse-çempionu, "Bolonya" isə ölkə kubokunun hazırkı sahibidir. Digər yarımfinal oyununda İtaliya çempionu "Napoli" kubokun son finalçısı "Milan"ı 2:0 hesabı ilə məğlub edib.

İtaliya Superkubokunun final qarşılaşması dekabrın 22-də baş tutacaq. Ötən mövsüm bu titulu "Milan" qazanmışdı - komanda finalda "İnter"ə 3:2 hesabı ilə qalib gəlmişdi. Turnirin tarixində ən çox çempionluq yaşayan klub isə 9 dəfə kuboku qazanan "Yuventus"dur. "Bolonya" isə tarixində ilk dəfə İtaliya Superkubokunun finalında mübarizə aparacaq.